Падчас iмпрэзы аўтар растлумачыў стылістычна-вобразны строй сваiх працаў як трансцэндэнтны сімвалізм. Мастак адзначыў, што гэта спроба асэнсаваць сродкамі выяўленчага мастацтва сёньняшні надзвычай  складаны, цікавы і поўны таямніц сусьвет. Свабода творчасьці дазваляе мастаку мець свой адносна незалежны і адметны погляд на хаду падзей і разьвіцьцё грамадства. У той жа час мастак мае вялікую адказнасьць, паколькі сваёй творчасьцю ўплывае на разьвіцьцё і фармаваньне чалавечай асобы і яе сьветапогляду. Таму хрысьціянскія каштоўнасьці з'яўляюцца шкалой вымярэньня дабра і зла, сьвятла і цемры, яны ёсьць дамінуючым аспектам  творчасьці Генадзя Драздова.

Трэба адзначыць, што  таленавiтасць мастака  пасьпяхова праявiлася i ў галiне паэзii. Дзесяткі беларусаў, якiя сабраліся на адкрыцьцё выставы, зацікаўлена слухалi  вершы ў выкананнi аўтара.

Мае мары і памкненьні
вышэй за хмарачосы,
і не купяць іх босы
ні за якія грошы.
Маёй краіны няма на мапе,
яна ў сэрцы і ў душы,
маіх карцін няма ў Мэтраполітэн музэі,
але іх бачыць Бог са сваёй вышыні.


Мастацтва заўсёды мела функцыю ўзаемапранікненьня і дыялёгу паміж рознымі культурамі і рознымі народамі. У гэтым сэнсе можна разглядаць творчасьць Генадзя Драздова як зрэз беларускага мастацтва і
магчымасьць яго прапагандаваць у Амэрыцы.

Наталля Рабава