Цікавая дыскусія паміж вядомым дзеячам беларускай эміграцыі шматгадовым кіраўніком Беларускага Амэрыканскага Задзіночаньня (БАЗА) Антонам Шукелойцям ды героем сустрэчы закранула пытаньні сельскай гаспадаркі і прыватнай уласнасьці на зямлю, адметнасьці сытуацыі Беларусі ў нацыянальным аспэкце і існаваньня антыбеларускай улады ў краіне, ролі інфармацыі ў дасягненьні пэўных мэтаў. Удалося непасрэдна на сустрэчы дамовіцца і пра ўдзел спадара Шукелойця ў новым інфармацыйным праэкце – інтэрнэт-тэлебачаньні, якое распачне сваю дзейнасьць ужо ў бліжэйшы час і ахопіць цэлы шэраг краін.

Адказваючы на пытаньні з залі, распавёў Павел пра палітыку ЗША і Эўразьвязу ў дачыненьні да Беларусі. Ён адзначыў, што пазыцыя Штатаў пасьля зьмены прэзыдэнта застаецца даволі жорсткай і прынцыповай (хоць і з некаторым адыходам у цень беларускай праблематыкі за пытаньні Афганістану, Іраку, Ірану, Пакістану). У той жа час Эўразьвяз як супольнасьць розных краін у сваёй палітыцы больш забюракрытызаваны, супярэчлівы і рознастайны. І зараз ЭЗ у большай ступені спрабуе бараніць свае эканамічныя інтарэсы, крыху адсоўваючы ўбок пытаньні іншыя – у тым ліку і патаньні свабод.

Павел падзякаваў беларускую грамаду Злучаных Штатаў за падтрымку і выказаў пажаданьне праз 2 гады чарговы кангрэс новай беларускай дыяспары ЗША і Эўропы ўпершыню правесьці ў Амэрыцы.