Прэміямі былі ўганараваны Аляксандр Рашын і яго дачка, якая зрабіла 15 арыгінальных малюнкаў на тэму халакосту.

Ў вялікай залі, што сабрала шмат людзей, памятаючых аб трагічных падзеях 20-га стагодзьдзя, выступоўцы нагадвалі аб захоўваньні памяці пра халакост і сталінскія рэпрэсіі, аб нявінна загінўшых ды забітых і закатаваных у лягерох людзях. Як вядома, жахлівая гісторыя часоў вайны сур'ёзна закарнула  і Беларусь, і беларусаў: на тэрыторыі Беларусі  пад час Другой Сусьветнай вайны загінула каля мільёну габрэяў.

У залі музэя была разгорнута арганізаваная Беларускім Музэем у Нью-Ёрку мастацкая выстава з 15 алейных твораў мастакоў з Беларусі.

Палотны мастакоў з Беларусі гарманічна ўпісваліся ў настрой мерапрыемства. Пачынала экспазіцыю вялікае палатно Генадзя Драздова з выявай смуткуючай фігуры: ці чалавека ці то анёла.

На выставе былі паказаны таксама творы Алеся Марачкіна, Янкі Рамановіча, Алеся Шатэрніка і Юліі Шатэрнік. У выставе таксама прыняў удзел скульптар Эміль Зільберман з Нью-Джэрсі.

Сапраўды вялікую справу дзеля захавання памяці пра халакост і пра ахвяраў сталінскіх рэпрэсій робіць галоўная арганізатарка мерапрыемства Людміла Прахіна. Яна ўжо шмат гадоў працуе на асабістым энтузіязме. І дапамагае ёй у гэтым яе сям'я: два яе сыны, нявесткі. Побач зь імі былі і ўнучкі, якія  таксама ўдзельнічалі у канцэрце.