"Беларускі Моладзевы Рух Амэрыкі"

Заява

Сябры Беларускага Моладзевага Руху Амэрыкі выказваюць падтрымку беларускім журналістам, якія якасна выконваючы свае абавязкі па забесьпячэньню канстытуцыйнага права беларусаў на атрыманьне праўдзівай і поўнай інфармацыі аб падзеях у Беларусі, жорстка перасьледуюцца ўладамі краіны.

Працуючы ў цяжкіх умовах, рызыкуючы сваім здароўем, беларускія журналісты на працягу ўжо больш чым пятнаццаці гадоў пэрманэнтным рэпрэсіям. Выкраданьне Дзьмітрыя Завадзкага, забойствы Веранікі Чаркасавай і Васіля Гроднікава, закрыцьцё ды зьнішчэньне за дзесяцігодзьдзе больш чым дзьвюх соцень незалежных друкаваных выданьняў, шматразовыя факты зьбіцьця і затрыманьня журналістаў пад час выкананьня імі сваіх прафэсыйных абавязкаў прадстаўнікамі міліцыі, а таксама шматлікія незаконныя перашкоды працы журналістаў супрацоўнікамі спецслужбаў у апошнія месяцы дапоўніліся дадатковымі жахлівымі дзеяньнямі ў дачыненьні прадстаўнікоў медыяў.

«Неўстаноўленыя асобы» душаць Сяргея Грыца, фатографа агенцыі Associated Press. Фота Васіля Фядосенкі, фатографа Reuters.

Перасьлед вядомай журналісткі Ірыны Халіп, арышт журналіста "Белсата" Івана Шульгі, вобшук ў офісе газэты "Народная Воля" ды на працоўных месцах шэф-рэдактаркі ды журналісткі выданьня Сьвятланы Калінкінай і Марыны Коктыш, затрыманьне і абвінавачваньні фотарэпарцёра газэты "Наша Ніва" Юліі Дарашкевіч, зьбіцьцё рэдактаркі "Хартыя'97" Натальлі Радзінай і вобшук з канфіскацыяй апаратуры ў офісе сайта сьведчаць пра наўмысныя дзеяньні з боку ўладаў з мэтай перашкодзіць журналісцкай дзейнасьці ды запалохаць журналістаў.

Беларускі Моладзевы Рух Амэрыкі:

- падтрымлівае журналістаў беларускіх незалежных медыяў;

- расцэньвае апошнія падзеі як грубае ўмяшаньне ў свабоду журналісцкай дзейнасьці;

- падтрымлівае заклік ГА "Беларуская Асацыяцыя Журналістаў" аб неадкладным прыняцьці мер для абароны парушаных правоў і законных інтарэсаў журналістаў, ды, адпаведна - свабоды слова ў Беларусі;

- абвяшчае пра спрыяньне ўсеаб'емнаму распаўсюду інфармацыі ў Злучаных Штатах Амэрыкі і сьвеце аб парушэньнях правоў журналістаў у Беларусі ды адпаведна парушэньні канстытуцыйных правоў беларускіх грамадзян на атрыманьне праўдзівай інфармацыі аб сытуацыі ў краіне.

27 сакавіка 2010

---

Вашай увазе - некаторыя камэнтары сусьветных СМІ аб апошніх парушэньнях свабоды слова ў Беларусі.

- «Голас Амэрыкі»:  «Беларускія журналісты зноў адчуваюць ціск з боку праваахоўных ворганаў краіны. Экспэрты лічаць, што дзеяньні беларускай міліцыі супрацьзаконныя, а ператрусы і затрыманьні журналістаў, якія пачасьціліся ў апошнія некалькі тыдняў, з'яўляюцца ні чым іншым, як свайго кшталту «зачысткай» інфармацыйнай прасторы напярэдадні прэзыдэнцкіх выбараў 2011 года».

- Радыёстанцыя "BBC": «Супрацоўнікі беларускіх спецслужбаў у аўторак правялі аперацыю супраць непадцэнзурнага сайта Хартыя'97 і шэрагу незалежных журналістаў».

- Міжнароднае французскае радыё RFI:  "Праваабарончыя арганізацыі сьвету асудзілі рэпрэсіі беларускіх уладаў супраць журналісцкай супольнасці. Ператрусы праходзяць на падставе «справы аб паклёпе». Праваабаронцы сцвярджаюць, што гэта не больш чым падстава. Ды і вайна кампраматаў, на іх думку, у гэтым выпадку справа другасная. Андрэй Саньнікаў упэўнены, што такія паводзіны ўвогуле тыповыя для цяперашніх беларускіх уладаў, але «абвастрэнне» адбываецца напярэдадні вялікіх палітычных кампаніяў.

- Буйны польскі тэлеканал TVN24 перадаў пра напад міліцыі і спецслужбаў на сайт charter97.org, адзначыўшы, што рэдактарка Натальля Радзіна звязвае ператрус і канфіскацыю тэхнікі ў журналістаў з тым, што «Лукашэнка баіцца свабоды слова і рэальнага суперніка на маючых адбыцца прэзыдэнцкіх выбарах».

Вядучае польскае друкаванае выданьне «Gazeta Wyborcza»: "Буйнамаштабныя ператрусы ў дамах лідэраў апазыцыі ў Беларусі ня маюць нічога агульнага з крымінальнай справай, на якую спасылаецца міліцыя, праводзячы ператрусы. А «паляўнічая справа», сутнасць якой заключаецца ў канфлікце паміж беларускімі сілавымі структурамі – міліцыяй і КДБ, зьяўляецца толькі падставай для нападу на свабоду слова".

Польская газэта «Rzecz Pospolita»: «Захоп рэдакцыі парталу charter97.org быў не выпадковы». За дзень да гэтага, у панядзелак сайт паведаміў, што кандыдатам на прэзідэнцкіх выбарах будзе лідэр кампаніі «Еўрапейская Беларусь» Андрэй Саннікаў.